Posts Tagged ‘volontarjat’

  • XTAQT INSIR QASSIS – intervista mas-sindku ta’ Wied il-Għajn li jaħdem fil-Missjoni

    Mario Calleja ma' xi tfal mill-PerùGħalija Jannar huwa xahar ta’ bidla, ta’ deċiżjonijiet… ċans ieħor biex tibda sena ġdida ta’ opportunitajiet. Għaldaqstant nitfixkel u ninħasad wisq meta speċjalment f’daż-żminijiet iseħħu traġedji koroh bħat-terremot f’Haiti dil-ġimgħa. Jibdew jgħaddu minn quddiem moħħi d-diversi ħajjiet mitlufa jew mkissra, il-pjanijiet li kellhom – issa inutli, dak kollu li qatt ħadmu għalih – trab. Ma tistax ma tħossx u m’hemmx bżonn ta’ ħafna persważjoni biex iddaħħal idejk fil-but u tgħin kemm tista’. Imma fil-fond ta’ qalbi nammira qatiegħ lil min għandu l-kuraġġ biex jitlaq kollox u jmur jagħti daqqa t’id.

    Kumbinazzjoni dil-ġimgħa kont iddeċidejt li nitratta x-xogħol volontarju f’pajjiżi oħra u tħajjart inkellem lis-sindku tal-Kunsill Lokali ta’ Wied il-Għajn. Għażilt lilu għax qanqalli l-kurżità. Nistqarr illi lil Mario aktar kont inqisu bħala xi negozjant, dejjem pulit bil-ġlekk u l-ingravata. Lanqas biss qatt għaddieli minn moħħi li dar-raġel kien qed jagħmel xogħol volontarju fost il-fqar tal-Perù. Fuq kollox hu stqarr miegħi illi f’żogħżitu kellu ħajra kbira li jsir qassis, xewqa li għadha tħabbat sewwa f’qalbu. Saħaq illi li kieku kellu jerġa’ jitwieled mill-ġdid did-darba ma kien ikollu l-ebda dubju – kien isir qassis missjunarju…

    “Meta kont żgħir kont immur l-iskola tas-Sależjani – Savio College, Ħad-Dingli. Awtomatikament meta titrabba fl-ambjent tas-Sależjani qisek titla’ bi prinċipju li tkun karitattiv. Niftakar sewwa illi ta’ tifel li kont, kont inħoss ġibda kbira lejn il-kleru. Iva, ikkunsidrajt u xtaqt insir qassis. Imma kultant f’dawn l-affarijiet, jekk ma jkollokx lil xi ħadd fil-familja, qisek ma jkollokx kuraġġ biżżejjed biex tagħmel dal-pass u minflok taqbad triq oħra.

    Fl-istess ħin, forsi bla ma tirrealizza, jibda jiġbdek xogħol fejn tagħti servizz. Fil-fatt għamilt żmien naħdem fil-catering fejn allura tħarriġt b’mentalità illi l-klijent dejjem għandu raġun. F’dax-xogħol tgħallimt inkun umli, edukat u prudenti. Imbagħad, wara xi snin, dħalt fil-korp tal-pulizija fejn għalkemm ix-xogħol kien ta’ natura għal kollox differenti, xorta waħda kont qed nagħti servizz.”

    Imma l-ġibda lejn il-volontarjat kif bdiet?

    “Nemmen li l-volontarjat jitwieled fik, bħal don. Inti f’qalbek tkun tħoss ħafna għal ħaddieħor. Imbagħad, f’xi żmien minn ħajtek, ikollox is-sejħa minn Alla…. u minn hemm jibda kollox.

    Niftakarha ċara dik il-ġurnata meta ħassejt il-ġibda għal volontarjat. Sinċerament, qatt ma kont ħsibt fiha qabel. Kont qed insuq u nisma’ r-radju u f’ħin minnhom nisma’ diska bl-isem ‘Iddeċidejt’. Dak il-ħin ħassejt xi ħaġa mhux tas-soltu, idejja bdew jitriegħdu u kelli nieqaf għal ftit minuti f’ġenb. F’qalbi bdejt inħoss li Alla ried xi ħaġa minni. Dakinhar għamilt il-ġurnata kollha mfixkel u bil-lejl m’għalaqtx għajn m’għajn. Sewwa jgħidu – min jipprova jifhem ‘l Alla jiġġennen hu għax Hu jkun qed jaħdem kollox bizzilla.

    L-għada mort sal-Knisja ta’ Santu Wistin il-Belt għax sirt naf li hemmhekk kellhom xi qassisin il-Brażil li kienu qed jagħmlu xogħol missjunarju. Imma meta urejthom ħsibijieti, li xtaqt nagħmel esperjenza qasira fil-missjoni, dawn ġabuhieli bi kbira ħafna. Qaluli li kelli nagħmel sena kors u li ridt nitgħallem il-lingwa. Matul daż-żmien huma setgħu jixtarru jekk jien kontx tajjeb biżżejjed għal dax-xogħol. Imma wara għoxrin sena fil-korp, fejn rajt u għaddejt minn ħafna affarijiet, ma kellix dubju li kont kapaċi nidħol għal biċċa xogħol bħal din ta’ xahar, xahrejn kollox. Tlaqt minn hemm imma emminni, la l-pjan t’Alla jkun beda, diffiċli ħafna biex wieħed ixekklu.  Il-ġurnata ta’ wara, inzertajt iltqajt ma’ persuna li qaltli li ħabib tagħha, Fr Giovanni Cefai Camilleri minn Ħaż-Żebbuġ, Għawdex, kien qed jagħmel xogħol ta’ missjoni fil-Perù. B’sempliċiment email ikkomunikajna flimkien u sirna nafu lil xulxin sakemm finalment ikkonfermajt li xtaqt nitla’ nesperjenza x’inhi li tmur tagħmel missjoni hemmhekk.”

    Għaliex il-volontarjat barra l-pajjiż? Hawnhekk ma temminx li tista’ tagħmel dax-xogħol ukoll?

    “Jiena nagħmel xogħol volontarju hawnhekk ukoll! Ix-xogħol tal-kunsill għalija hekk hu. Taħseb illi l-onorarja li nieħu bħala sindku hija l-istess ħaġa li naqla’ likieku kelli mmur naħdem ma’ xi kumpanija privata? Is-sigriet huwa illi s-sodisfazzjon li tieħu meta tgħin, ma jistgħu qatt jagħtuhomlok il-flus. Fil-fatt jiena għalhekk għażilt li nissieħeb mal-partit laburista fil-politika għax is-soċjaliżmu jfisser li inti tipprova taqdi u tgħin lil dak li hu fil-bżonn.

    Staqsejtni għaliex barra… F’pajjiż ieħor ikollok iċ-ċans tara u tagħmel affarijiet li hawnhekk qatt mhu ser toħlom biss, aħseb u ara. Biss biss il-faqar li ssib f’ċertu pajjiżi huwa ndeskrivibbli – allaħares jeżisti f’Malta! U mbagħad hemm esperjenzi oħra bħal meta Fr Giovanni bagħtni niftaħ it-tabernaklu biex inġiblu l-ostji; xi ħaġa li qabbditni l-bard għax ma ħassejtnix denju. Iżda hekk kif dawwart iċ-ċavetta u t-tabernaklu nfetaħ bdejt nisma’ ġo moħħi “Qed tara xi tlift? Qed tara?”. Hemm bosta raġunijiet u stejjer li nista’ nirrakkuntalek.”

    X’inhi l-akbar sfida biex tagħmel dan it-tip ta’ volontarjat?

    “Li titlaq kollox warajk għal ftit żmien. Dan kulħadd kulħadd ikollu l-familja, x-xogħol u l-impenji tiegħu. Sfida oħra hija li jrid ikollok kuraġġ biżżejjed biex taffaċċja dak li ssib quddiemek: il-mard, il-faqar, l-injoranza u l-kultura differenti.

    La tmur fost il-faqar ta’ veru, trid tmur ippreparat għal kollox fostom per eżempju li tpoġġi bil-qiegħda ma’ familja fqira u tiekol mill-ikel imsajjar bl-inqas mod iġeniku li tista’ timmaġina u mferrgħa minn ġo borom imsadda u maħmuġa.

    Barra minn hekk, jiena iddeċidejt li ntella’ xi flus miegħi ħalli nkun nista’ ngħin f’xi proġetti. B’dan il-għan ġbart xi affarijiet u mort inbiegħom is-suq tal-Birgu fis-siegħat bikrin ta’ fil-għodu. Peress li jiena jafuni ħafna nies, kien hemm min staqsini x’qed nagħmel hemm? Kien hemm min għeni ħafna. Uħud tawni l-flus akkost li ma xtraw xejn u l-ewwel darba li mort tellgħajt miegħi s-somma ta’ Lm1500. Finalment ħassejtni kburi ħafna bija nnifsi li dħalt għal sfida bħal din.”

    Fil-Perù, minn xhiex sibthom l-aktar nieqsa n-nies?

    “Jiena kont noqgħod f’appartament ħdejn il-knisja ta’ Fr Giovanni ġewwa La Tomilla f’Arequipa. Il-faqar li rajt u missejt b’għajnejja kien kbir. Dawk li mit-triq jidhru djar mhumiex ħlief kmamar. F’kamra waħda jgħixu sitta min-nies bla dinjità ta’ xejn u kultant lanqas ikollhom għaxja ta’ lejla. Faċilitajiet sanitarji xejn, id-‘djar’ vojta, friġġ ma teżistix – l-aktar l-aktar, jekk ikollhom xi ħaġa li jridu jneħħuha minn taħt il-qilla tax-xemx, jidfnuha taħt il-ħamrija.

    Imma l-akbar nuqqas li għandhom huwa l-imħabba. Fil-fatt għalihom, aktar milli l-flus li ttella’ miegħek biex tgħinhom, japprezzaw il-fatt li inti indenjajt titlaq id-dinja tiegħek biex tqatta’ ftit ġranet magħhom.”

    X’tip ta’ għajnuna tajt s’issa?

    “L-ewwel darba li tlajt għaddejt il-flus lil Fr Giovanni, li dan min-naħa tiegħu użahom biex itaffi ftit mit-tbatija tan-nies. Imma dis-sena rnexxieli ntella’ s-somma ta’ 6000 ewro (bl-għajnuna ta’ diversi Joe Micallef iqassam xi ħwejjeġSkalin u individwi minn lokalitajiet oħra) u bihom lestejna l-klinika ta’ La Tomilla minn kollox. Għalkemm ikollok il-limitazzjonijiet tiegħek, hemmhekk il-munita tagħhom tant hi fqira illi b’$100 did-darba rnexxieli wkoll nibni roqgħa bit-turf u l-bandli kompluti b’kollox fis-sit ta’ skola żgħira li jisimha Malta. Kont kuntent ukoll għax f’dal-post issa tellgħu l-bandiera ta’ Wied il-Għajn.

    Nippreferi ħafna meta l-għajnuna li nagħti tkun sostenibbli u li tibqa’ titgawda għal tul ta’ żmien u minn ħafna nies. Imma mbagħad kien hemm xi ħadd tal-familja li tani xi ħwejjeġ tat-tfal kważi ġodda u qassamthom lil xi tfal hemmhekk. Ħadu pjaċir bihom ħafna. Biex infiehmek naqra x’tip ta’ faqar jeżisti hemmhekk, l-ewwel darba li mort, domt xahrejn f’La Tomilla. Ċertu tfal innutajthom illi kienu bi ħwejjeġ partikolari fl-ewwel ġurnata  u meta ġew biex isellmuli għax kont ser nitlaq, kienu għadhom bl-istess flok u qalziet! Dan biex ma nsemmilekx li uħud minnhom kienu jaqilbu l-flokk ta’ taħt fuq (biex taparsi biddlu) għal meta jmorru l-quddies tal-Ħadd.

    Fit-tieni darba li mort, tellgħajt ukoll erbgħa stetoskopji li offrili Dr Josie Muscat sabiex ngħaddihomlhom għall-klinika tagħhom. Wieħed minn dawn l-istetoskopji fil-fatt tajtu lill-kummissarju tal-pulizija (peress li l-pulizija hemmhekk għandha l-isptar tagħha) bil-patt li jekk Fr Giovanni jkollu bżonn is-servizzi tal-isptar tiegħu, hu kellu jgħinu bl-aħjar mod.

    Bil-ftit flus li kien fadal, organizzajna wkoll ikla għan-nies tal-post. Morna s-suq tal-belt minn fejn xtrajna 13 il-biċċa majjal u ftit ħaxix u għamilna festa bihom! Għalihom li jieklu biċċa laħam hija xi ħaġa speċjali. Biex tifhimni, s-soltu nsajjar borma brodu għal nofsinhar għal 30 tifel u tifla permezz ta’ tadama waħda, borma ilma u ponn ross.”

    Jgħidu li bniedem aħjar tagħtih il-qasba milli l-ħut…

    “Iva tagħtih il-qasba… imma l-ħut fejn qiegħed? F’dan il-post opportunitajiet m’hemm assolutament xejn. L-aktar l-aktar jitilgħu sas-suq kmieni fil-għodu biex forsi xi ħadd iqabbadhom qadja u jħallashom. Il-bqija l-art niexfa qoxqox għax ma tagħmilx xita. Fuq kollox in-nies huma mrobbija b’kultura differenti maħkuma minn rassenjazzjoni assoluta għal dil-ħajja ta’ faqar. Twieldu f’dak il-post u raw lill-ġenituri tagħhom jgħixu hekk u għalhekk ma jafux aħjar. Il-biċċa l-kbira tagħhom lanqas sal-belt (li tinsab nofs siegħa l-bogħod bil-vann) qatt ma marru għax m’għandhomx biex iħallsu għat-trasport. Ħajjithom bla skop.

    Fil-fatt din hi xi ħaġa li issa qegħdin jitgħallmu wliedhom fl-iskejjel – li tgħin ruħek, li titgħallem, li jkollok għan fil-ħajja biex timxi ‘l quddiem. Bi pjaċir ngħid illi d-dentist u n-ners huma nies tal-post u għal paga miżera, dawn jagħmlu xogħol utli immens. Madanakollu f’dawk l-inħawi, jkolli nammetti li l-opportunitajiet diffiċli ħafna.”

    Imma dawn in-nies kif ġew f’din il-kundizzjoni estrema ta’ faqar?

    “Ġeneralment l-ewwel ħsieb li jiġik fil-gvern u hawnhekk nista’ ngħidlek li dawn in-nies m’għandhom l-ebda għajnuna soċjali. Li kieku ma jipprovdilhomx Fr Giovanni permezz tal-benefatturi tiegħu, kieku Alla m’għamilhom.

    Dawn huma nies li jsibu post li għandu ftit ilma, jinġabru hemm mingħajr ma jkollhom xejn u jibnu t-tribu tagħhom. Il-ġebla tagħhom tixbaħ ħafna lill-ġablo iebes u għalhekk malajr itellgħuha kamra. Imma nista’ ngħidlek li f’Malta, l-fniek tagħna fil-gallinari, jinżammu f’kundizzjoni ħafna aħjar.

    Barra minn dan, in-nuqqas ta’ edukazzjoni twassal għal aġir mhux f’loku. Insemmi per eżempju l-każi ta’ inċest bejniethom li jikkaġunaw bosta tfal li jbatu b’xi forma ta’ diżabbiltà. Imbagħad ikun hemmFr Giovanni Cefai Camilleri ukoll dawk l-irġiel li wara li jkollhom it-tfal minn mara, jmorru jaħdmu f’Lima bit-tama li jsibu xogħol aħjar. Hemmhekk ġeneralment jiltaqgħu ma’ mara oħra, jkollhom it-tfal minnha wkoll, jibnu familja oħra hemm u lill-familja tagħhom f’Latomilla jabbandunawha.

    Fejn jidħol mard imbagħad iridu jħallsu għal inqas ħaġa. Biex jagħmlu operazzjoni per eżempju jridu jħallsu saħansitra tal-labbra u tas-sikkina. Għalhekk kważi kważi, meta jaslu f’dak l-istat, nieshom kważi jippreferuhom imutu għax ma jkollhomx biex iħallsulhom il-kura! Ara, jekk naqbad nirrakkonta, lanqas nispiċċa!”

    Għalik li tkun fqir, xi jfisser?

    “Hemm diversi livelli ta’ faqar. Ngħidu aħna f’pajjiżna l-faqar huwa pjuttost relattiv; wieħed iħossu fqir għax ma jistax jixtri l-lussi li jiflaħ jakkwista ħaddieħor. Fl-istess ħin ma rridx ninsa wkoll illi meta kont fil-korp, għamilt żmien immexxi l-vice squad u waqt dak ix-xogħol kien hemm mumenti fejn il-faqar li sibna ma’ wiċċna kien iqarreb sewwa lejn dak li rajt fil-Perù.

    Meta tara l-faqar fuq it-TV forsi tasal biex tifhem ftit x’jiġifieri tkun tassew fqir u bla ma trid tlissen “imsieken”. Imma l-veru faqar biex tifhmu trid tkun f’nofsu, tarah b’għajnejk u tmissu b’idejk – tesperjenzah fir-realtà qarsa tiegħu.

    Biex nagħtik eżempju, dis-sena tela’ miegħi ukoll Joe Micallef, il-President tal-Għaqda Mużikali Sant’Anna Wied il-Għajn. Kont ilni ħafna nirrakkuntalu u nurih ir-ritratti ta’ x’hemm f’La Tomilla. Imma waqt li konna hemm darba lissen “illum nifhem x’hawn!”. Joe ħadem ħafna miegħi, dorna bosta postijiet u nies u dħalna f’ħafna stejjer u ġrajjiet ta’ nies tassew fqar. Stajt nara lil Joe jitqanqal dejjem aktar, ġurnata wara l-oħra. L-għożża li jilqgħuk biha, akkost li jgħixu f’tant għaks, ma tistax ma tmisslikx qalbek. Lil Joe mhux l-ewwel darba li rajtlu d-dmugħ f’għajnejh.”

    Mario qabad ritratt partikolari…

    “Ara eżempju tal-faqar,” qalli. “Lil dar-raġel sibnih fl-art, mitluq wara ħajt tas-sejjieħ. Indunajna bih għax kważi rfisnih. Kien bil-ġuħ mejjet u jien tajtu jixrob ftit mill-yoghurt li kelli f’idi. Kellu d-dwiefer ta’ saqajħ suwed faħma u mdawwrin bħal tal-għasafar. Għajnejħ kienu magħluqin b’infezzjoni. Kif ħares lejja rajtlu ragħwa ħadra ħierġa minn ħalqu. Kien qed jomgħod werqa tal-cocoa għax din tgħinu biex ma jħossx ġuħ għall-ġurnata sħiħa.”

    Liema kien l-aktar mument memorabbli?

    “Darba morna nżuru familja. Sibna r-raġel barra, jistrieħ ma’ ċint, viċinu kellu rota u kien qed iħares fil-vojt. Meta dħalna f’daru sibna lil martu qed tmut b’infezzjoni fl-istonku. Ħdejha, mimdudin fis-sodda, kellha żewġt itfal li jbatu b’diżabbiltà. Il-mara kienet qed tibki, ddisprata u muġugħa u ma tafx x’ser taqbad tagħmel biex tgħin ruħha. Dak il-ħin inħsadna, ikkuntattjajna l-klinika u ġiet tabiba malajr li tatha injezzjoni. Tajniha wkoll xi flus biex ngħinuha. Imma dak kollu li stajna nagħmlu. Li kompla mmeraviljani kien illi wara jumejn telgħet tfittixni l-knisja. Ġabitli żewġ skufji mgeżwrin ġo karta tal-Milied. Meta ġejt biex nitlaq, ġiet issellimli. Għożżejthom ma’ qalbi daż-żewġ rigali u għalkemm għalija m’għandhom l-ebda użu, fl-istess ħin ifissru ħafna għax ifakkruni li dakinhar aħna salvajna ħajja ta’ bniedem.”

    Illum xi jfisser għalik dax-xogħol volontarju?

    “Il-missjoni għalija llum ġiet kilba, bħal meta bniedem ipejjep. Għadni kif missejt lura ma’ dil-blata u diġà moħħi qed ibherren kif ser nerġa’ nitla’ sentejn oħra. Għad-darba li jmiss għandi proġett ieħor: dik li nibni kappella u klinika ħalli nkabbru villaġġ li bħalissa jeħtieġ ħafna għajnuna. Nixtieq ukoll intella’ grupp mediku miegħi sabiex idealment ikun jista’ jagħmel xi interventi hemm.

    S’issa mort darbtejn f’La Tomilla u hemm nerġa’ mmur. Ma rridx li n-nies jaħsbuni xi qaddis taf, għax m’inix. Fil-fatt kien hemm min saħansitra ikkritikani fuq il-gazzetti lokali għax saħaq li ma kellix għalfejn noqgħod ngħid li sejjer nagħmel missjoni. Imma jekk ma titkellimx man-nies, kif ser tiġbor il-flus biex tkun tista’ tgħin?

    Jiena anzi ngħid aktar minn hekk … nistieden lil min hu mħajjar sabiex jiġi magħna u jqatta’ ftit ġranet jagħti daqqa t’id. Min-naħa l-oħra min jixtieq jgħin bil-flus, jeżistu kontijiet apposta: Mario Calleja – Fondi Perù BOV – 40013785673 jew HSBC – 049-012065-050.”

    (Dan l-artiklu ġie ppubblikat fit-Torċa tas-17 ta’ Jannar 2010)

    2010.01.17 / no responses / Category: Torca - Perspettivi

  • SALVAJT ĦAJJA TA’ BNIEDEM

    Meta nisma’ b’xi dizastru li jkun sehh madwar id-dinja, niksah. Nibda nhewden li kieku minflok dak il-pajjiz, intlaqtet Malta, kemm konna nkunu ppreparati biex nirreagixxu u nsalvaw kemm nistghu nies?U jien? Jien x’inkun kapaci naghmel?Inkun nista’ nghin? Ikolli sahha nsalva jew inkun l-ewwel wahda li ncedi u nintilef? B’dawn il-hsibijiet iltqajt mac-Chairman tal-Malta Red Cross u flimkien iddiskutejna kif il-poplu Malti jista’ jitharreg ghall-eventwalitajiet bhal dawn. Fuq kollox hareg ukoll illi t-tahrig jghin fil-hajja ta’ kuljum ghax incident ma tafx meta jista’ jinqala….

    INTERVISTA: EDWARD GRUPPETTA – Chairman – Malta Red Cross (First Malta Branch)

    Kif oriġinat ir-Red Cross?

    Dis-sena qed niċċelebraw il-150 anniversarju minn meta twaqqfet is-Soċjetà tas-Salib l-Aħmar. L-oriġini tagħha tmur lura għal 1859 u kienet l-ispirazzjoni tan-negozjant Svizzeru, Henry Dunant. Dak iż-Edward Gruppetta waqt attivita'żmien fin-naħa ta’ fuq tal-Italja kienet għaddejja l-Battalja ta’ Solferino u eluf ta’ suldati miż-żewġ naħat kienu qed jitħallew feruti u f’sofferenza kbira mingħajr ħadd ma jieħu ħsiebhom. Dunant inħasad meta ra din il-moħqrija u l-ħela ta’ ħajja. Ġietu f’rasu illi kieku kien hemm xi ħadd li seta’ jagħti l-ewwel għajnuna lil dawn l-individwi, setgħu jsalvaw ħafna aktar nies. Huwa beda jħarreġ lin-nisa tal-villaġġi fis-servizz bażiku tal-First Aid. U hekk min-negattiv tal-gwerra, ħarġet xi ħaġa pożittiva u twieldet is-Soċjetà tas-Salib l-Aħmar.

    X’ifissru s-simboli tar-Red Cross?

    Oriġinarjament is-simbolu tas-Soċjetà kien salib aħmar fuq bandiera bajda (il-kuntrarju tal-bandiera tal-Isvizzera). Imma maż-żmien is-Soċjetà bdiet tinvolvi ruħha f’diversi attivitajiet fostom dawk politiċi u reliġjużi u s-salib beda jieħu tifsira reliġjuża. Ġara b’hekk illi l-Musulmani bdew jassoċċjaw is-salib l-aħmar mal-Kristjaneżmu u għaldaqstant ma kienux aktar komdi b’dan is-simbolu. Biex tinżamm in-newtralità ġie maqbul illi tiddaħħal ukoll bandiera b’qamar aħmar li tirrapreżenta s-Soċjetà tal-Qamar l-Aħmar. Madanakollu l-Iżraeliti qatt m’aċċettaw dawn iż-żewġ simboli u għalhekk, wara diversi diskussjonijiet riċentement qed jintuża wkoll it-tielet simbolu – dak tal-kristall l-aħmar.

    Irridu niċċaraw illi dawn is-simboli huma protetti u fil-fatt ħadd ma jista’ jaqbad  u jużahom mingħajr il-permess tal-gvern tal-pajjiż. Is-serjetà tal-użu tagħhom hija vitali minħabba illi dawn jagħtu protezzjoni waqt il-gwerer. Użu ħażin ta’ dawn is-simboli jħalli diversi riperkussjonijiet u konsegwenzi.

    Meta twaqqfet il-Malta Red Cross?

    Il-bidu tal-Malta Red Cross żvolġa meta kien daħal f’pajjiżna vapur bir-refuġjati Albaniżi u ma kien hawn ħadd li seta’ jagħtihom l-ewwel għajnuna. Fis-sittinijiet f’Malta kien hawn il-British Red Cross imma aktar tard ma baqgħet l-ebda rappreżentanza ta’ din is-Soċjetà f’pajjiżna.

    Biex pajjiż ikun membru tar-Red Cross, il-gvern ta’ dak il-pajjiż ikun irid jintrabat bil-Konvenzjonijiet ta’ Ġinevra u għalhekk it-talba biex titwaqqaf għaqda ta’ din is-Soċjetà jkollha tgħaddi mill-Parlament. Fil-fatt il-Malta Red Cross twaqqfet fl-24 t’Ottubru 1991 imma ġiet rikonoxxuta mill-gvern Malti f’Ġunju 1992 wara li din il-proposta għaddiet unanimament mill-Parlament Malti. F’Settembru tal-1993, il-Malta Red Cross ġiet ukoll rikonoxxuta uffiċċjalment mill-Federazzjoni Internazzjonali tas-Salib l-Aħmar.

    F’dawn l-aħħar snin il-Malta Red Cross għandha wkoll ir-regolaturi tagħha – il-President tas-Soċjetà:  il-Professur Frederick Fenech u s-Segretarja Ġenerali Dr Christina Saydon. Barra mill-Għaqda tagħna li hija l-First Branch Malta, issa hemm ukoll Għaqda tas-Salib l-Aħmar f’Għawdex u t-tnejn flimkien nieħdu ħsieb kif noperaw f’dan il-qasam bl-aħjar mod possibbli.

    Illum hawn 186 pajjiż li huma membri tar-Red Cross u dawn iħaddnu aktar minn 90 miljun volontarju.

    X’inhu l-iskop tal-Malta Red Cross?

    Wieħed mill-iskopijiet prinċipali huwa illi l-Malta Red Cross tgħin lill-awtoritajiet lokali speċjalment  lill-awtoritajiet tas-saħħa u lill-awtorità tal-Protezzjoni Ċivili billi tħarreġ kemm tista’ nies mill-pubbliku fil-First Aid. L-ewwel nett huwa neċessarju illi wieħed ikun jaf x’għandu jagħmel f’każ ta’ emerġenza. Barra minn hekk jekk qatt jinqala’ xi diżastru fil-pajjiż, huwa għaqli illi l-pubbliku in ġenerali jkollu almenu taħriġ bażiku biex ikun jista’ joffri l-ewwel għajnuna. L-ebda pajjiż qatt ma jista’ jserraħ biss fuq il-professjonisti f’każ ta’ xi diżastru. Żgur illi jkollu jaqa’ fuq il-voluntieri. Ovvjament aktar ma jkun hemm nies imħarrġa, aktar il-pajjiż ikun jista’ jirreaġixxi malajr u b’saħħa. Rajna x’ġara dan l-aħħar f’Aquila l-Italja u kemm il-voluntieri kienu siewja.

    Fhiex jikkonsisti t-taħriġ tal-First Aid u min jista’ japplika għalih?

    It-taħriġ fil-First Aid mhux biss sempliċiment kif tinfaxxa imma jkopri l-elementi bażiċi ta’ x’wieħed għandu jagħmel f’każ ta’ emerġenza. Kultant anki naqra ta’ telefonata taf issalva ħajja ta’ bniedem. M’għandikx idea kemm hawn nies illi f’każi bħal dawn jinfixlu u lanqas ikunu kapaċi jgħaddu t-tagħrif neċessarju! Ikun hemm min jippanikkja, jgħidlek nofs kliem u jaqta’ l-linja. Ġieli lanqas il-post tal-inċident ma jkunu jafu jispjegawlek fejn qiegħed. Dan kollu jirriżulta f’telf ta’ ħin siewi illi f’ċertu ċirkustanzi jiswa ħajja jew mewt.

    Meta wieħed isib ruħu quddiem inċident huwa importanti ħafna li jieqaf jaħseb għal ftit sekondi u mbagħad jaġixxi. Kultant meta wieħed jgħaġġel iżżejjed, jaf jirriskja li jweġġa’ hu wkoll u dan żgur li mhux l-iskop tagħna. Trid taħdem b’moħħok u mhux b’qalbek. Speċjalment jekk l-individwu jkun jiġi minnek, huwa vitali li żżomm il-kalma u li ma tħalli qatt il-paniku jaħkmek.

    Jekk qed tara lil xi ħadd li ħa xokk elettriku, per eżempju, ma tmurx tiġri fuqu u tmissu imma tmur titfi l-main tad-dawl. Jekk qed tara bniedem qed jifga f’xi ħaġa, preferibilment għandek tkun taf kif tgħinu jaqla’ l-oġġett għax f’ċertu każi, sakemm tmur iċċempel lill-ambulanza u din tiġi, fi kwarta kollox, bniedem jilħaq jifga u jmut. Jekk issib bniedem mitluf minn sensih, trid iddawwru fuq ġenbu u mbagħad issejjaħ għall-għajnuna, ħalli dan ma jifgax f’ilsienu jew fir-remettar tiegħu stess. Affarijiet sempliċi imma mhux ovvji. Għalhekk it-taħriġ fil-First Aid huwa tant importanti.

    Kulħadd jista’ jattendi għal dawn il-korsijiet. Tagħmel differenza kbira f’dak li jkun meta jaf li almenu jista’ jagħmel xi ħaġa biex jgħin, anki jekk hi żgħira kemm hi żgħira. Għal bidu jkun hemm min jiġi mbeżżgħa għax jaħseb li ser nidħlu fil-mediċina u li mhux ser ikun kapaċi jifhem. Imma fir-realtà aħna aktar naħdmu fuq prattika milli fuq teorija. Sal-lum qatt ma ġie ħadd u ma tgħallimx xi ħaġa li jista’ japplikaha fil-ħajja.

    Għal min imbagħad ikun jixtieq ikompli jitħarreġ, aħna noffru wkoll korsijiet ta’ livell aktar avvanzat fil-First Aid.

    Kemm jeżisti nteress fit-taħriġ tal-First Aid?

    Aħna waħda mill-organizazzjonijiet li nagħtu ħafna korsijiet fil-First Aid. Illum in-nies saru jiġru warajna huma biex nagħtuhom dat-taħriġ. Il-pubbliku qed isir aktar konxju dwar l-importanza tal-kapaċità li tagħti l-ewwel għajnuna. Irridu niftakru illi wieħed qatt ma jista’ jobsor meta jaf jinqala’ inċident. Intix id-dar, fil-karozza jew fuq il-post tax-xogħol, qatt ma tista’ tgħid x’jista’ jiġri. Issa li daħlet il-liġi tal-Health and Safety f’kull post tax-xogħol irid ikun hemm First Aid Box u xi ħadd li hu kapaċi li jagħti l-First Aid. Barra minn hekk irid isir Risk Assessment u skont il-periklu li joffri l-post, jittieħdu l-miżuri. Ngħidu aħna f’postijiet bħall-power station fejn ir-riskju huwa kbir, hemm bżonn li jkun hemm klinika u infermiera 24 siegħa kuljum, bl-ambulanza viċin għal li jista’ jinqala’. Anki fl-iskejjel ġieli niġu mitluba li nagħtu taħriġ bażiku lit-tfal u tiskanta kemm juru nteress u kemm jitgħallmu speċjalment meta mmorru bl-ambulanza, ndaħħluhom fiha u nuruhom l-affarijiet li nużaw. Nitkellmu magħhom dwar jekk isir inċident x’għandu jsir u kif jista’ wieħed jgħin.

    L-interess fil-First Aid qiegħed jikber imma mhux kemm nixtiequ. Nagħtu każ aħna tal-fehma illi ma’ kull liċenzja tas-sewqan li toħroġ, kull sewwieq għandu jkollu wkoll ċertifikat li attenda għall-kors bażiku tal-First Aid u li jġorr kaxxa tal-First Aid miegħu fil-karozza.

    Apparti t-taħriġ fil-First Aid, x’servizzi oħra toffri l-Malta Red Cross?

    Noffru servizz ta’ ambulanza u First Aid f’diversi attivitajiet tal-massa b’ko-ordinazzjoni mal-awtoritajiet tas-saħħa u tal-Protezzjoni Ċivili. Norganizzaw ukoll Blood Donations għax nemmnu ħafna li din Malta Red Cross- refuġjatiukoll tagħmel parti mill-għajnuna neċessarja. Għandna rappreżentant tagħna illi jaħdem fuq l-International Humanitarian Law fejn fostom imur jiltaqa’ man-nies fl-Armata Maltija u jispjegalhom dwar id-dmirijiet tagħhom f’każ ta’ konflitt militari bħal ngħidu aħna illi għandhom jipproteġu lin-nies ċivili u li ma jistgħux jisparaw fuqhom għalxejn u li wkoll iridu jirrispettaw lill-priġunieri. Hemm ukoll numru ta’ armi li jridu jintużaw b’ċertu limiti filwaqt li oħrajn huma projbiti li jintużaw f’ċertu postijiet. Rappreżentant ieħor jaħdem mar-refuġjati fejn l-oġġettiv prinċipali tiegħu huwa illi fejn hu possibbli jfittex lill-membri tal-familji biex jgħaqqadhom mill-ġdid flimkien. Nagħtu wkoll servizz tal-ewwel għajnuna fuq il-baħar. Naturalment aħna wkoll imħarrġa biex nagħtu rispons immedjat f’każ ta’ diżastri u nagħtu l-għajnuna tagħna anki lill-pajjiżi oħra skont il-bżonn meħtieġ.

    X’għajnuna ġieli tat f’pajjiżi oħra l-Malta Red Cross?

    Meta jinqala’ xi diżastru, l-pajjiż milqut jitlob l-għajnuna lill-Federazzjoni Internazzjonali tas-Salib l-Aħmar u jgħidlu x’tip ta’ għajnuna għandu bżonn u f’kemm żmien.

    Fl-2004 meta seħħ dak it-tsunami, il-Malta Red Cross kienet minn ta’ quddiem illi ġabret il-fondi għall-għajnuna. F’dak il-każ il-poplu Malti tant kien ġeneruż illi meta ppreżentajna l-ammont li ġbarna lill-Edward Gruppetta fi Sri Lanka Federazzjoni, din fdat f’idejna proġett kbir li kien jinkludi l-bini ta’ villaġġ li kien jikkonsisti f’65 dar u klinika fin-naħa t’isfel ta’ Sri Lanka. Aħna kellna nieħdu ħsieb l-immaniġġjar tal-bini u ridna nikkonfermaw illi l-flus qed jintużaw verament għal dan l-iskop u li l-għajnuna qed jeħduha dawk in-nies li tassew għandhom bżonn. Il-membri tagħna kienu jitilgħu biex jagħtu daqqa t’id u jieħdu ħsieb dan il-proġett. Jiena wkoll kont tlajt ħames ġimgħat nagħmel dan ix-xogħol. Hemmhekk irrealizzajt kemm kien importanti li nkunu fuq il-post għax kien hemm possibiltà kbira ta’ korruzzjoni u serq. Bil-flus li kellna konna ħaddimna lin-nies tal-post stess, li bosta minnhom kienu sajjieda u kienu spiċċaw bla xogħol. B’hekk dawn setgħu jkunu nvoluti huma stess fit-twaqqif tal-villaġġ tagħhom u fl-istess ħin jaqalgħu l-ħobża ta’ kuljum. Imma sibna li anki dawn kellhom bżonn il-protezzjoni tagħna għax uħud mill-kuntratturi li qabbadna aħna stess ma riedux iħallsuhom tax-xogħol tagħhom wara ġurnata iebsa taħt ix-xemx qalila. Biex żgur naraw li l-flus jaslu għand min kien ħaqqu kellna nbiddlu l-metodu ta’ ħlas. Ridna noqogħdu wkoll b’sebgħa għajnejn għall-materjal li beda jinġieb fuq il-post. Konna nwaqqfu t-trakkijiet u niċċekkjaw il-brikks per eżempju. Mhux l-ewwel darba li konna naqbdu xi erba’ briksiet f’idejna u kif nagħfsuhom ftit isiru trab. Ovvjament min jagħmel hekk kien ikollu jaqbad kollox u jmur lura bih u jerġa’ jiġi bil-materjal li nkunu ordnajna.

    F’każ fejn il-pajjiż milqut ma jkollux bżonn l-għajnuna tagħna, bħal fil-każ riċenti ta’ Aquila, aħna ġieli nkunu mistiedna biex nibagħtu xi membri minn tagħna biex josservaw dak li jkun qiegħed isir.

    L-esperjenza li tieħu waqt żminijiet bħal dawn hija kbira u tħalli mpatt qawwi sewwa fuqek.

    X’riżorsi għandha l-Malta Red Cross u x’tip ta’ għajnuna tirċievi?

    Is-Soċjetà tagħna għadha żgħira u baqagħlna ħafna x’naqdfu biex nilħqu l-pożizzjonijiet ta’ Soċjetajiet aktar stabbiliti. Madanakollu aħna naħdmu bla heda biex nagħtu l-aħjar servizz bir-riżorsi li għandna.

    Bħala flotta għandna żewġ ambulanzi li ġibnihom b’donazzjoni mill-Federazzjoni Internazzjonali tas-Salib l-Aħmar, pick-up, quad bike u niġu wkoll mislufa numru ta’ Segways meta nkunu qed naħdmu f’attivitajiet tal-massa.

    Il-lok minn fejn naħdmu bħalissa, għalkemm joffri protezzjoni lill-karozzi tagħna u jipprovdina b’post fejn nistgħu niltaqgħu, huwa għali wisq biex inżommuh. Fil-fatt bħalissa qed nippruvaw insibu post alternattiv fejn inkunu nistgħu nżommu l-karozzi tagħna u li fl-istess ħin ikun adattat biex noffru t-taħriġ fih.

    Spejjeż ikollna ħafna. Nippruvaw nagħmlu tajjeb għalihom permezz tad-donazzjonijiet li nirċievu, mill-ħlas tal-posts fejn noffru s-servizzi tagħna lill-kumpaniji privati u anki mill-flus li jitħallsu għall-korsijiet tal-First Aid. Naturalment l-għajnuna li nirċievu ma tkunx dejjem ta’ flus. Każ partikolari li qed niftakar per eżempju kien meta tawna numru ta’ roti sabiex inkunu nistgħu nsegwu lill-atleti waqt il-maratoni.

    Mingħajr is-sostenn kontinwu ta’ dawn l-individwi flimkien mal-ħin li joffru l-membri u l-voluntiera, il-Malta Red Cross ma tkunx tista’ tkompli teżisti.

    Kemm huma neċessarji l-voluntiera u kemm issibu nteress f’dan il-qasam?

    Mingħajr voluntiera ma nagħmlu xejn. Ikollna bżonnhom kontinwament għax bla voluntiera ma nistgħux noffru s-servizzi tagħna. Kull min jattendi l-korsijiet tagħna, jekk ikun jixtieq jgħin, aħna nkomplu nħarrġuh f’dak li hu jkun jixtieq jagħmel. Hemm diversi xogħlijiet li wieħed jista’ jgħin fihom, jiġifieri mhux kull voluntier ikun mitlub jiġi magħna biex jagħti l-First Aid. Hawn nies li ma jinqalgħux biex jgħinu b’dan il-mod għax jiddejqu mid-demm u l-feriti eċċ. Allura dawn l-individwi jkunu jistgħu jgħinuna fix-xogħol tal-uffiċċju, fil-kitba tan-newsletter, fil-manteniment tal-karozzi, tal-garaxx u tal-uniformijiet. Minn daqshekk ix-xogħol ma jispiċċa qatt u kull min jista’ jagħtina daqqa t’id, l-għajnuna tiegħu tkun apprezzata ħafna.

    Sfortunatament ikolli nistqarr miegħek illi meta nagħmlu xi attivitajiet biex inħajjru voluntiera ġodda, ftit li xejn ikun hemm rispons. Jista’ jkun illi tant hawn attivitajiet x’tagħmel illum u tant hawn organizzazzjonijiet volontarji illi wieħed ikollu jagħżel u n-nies jitqassmu.

    X’ifisser għalik is-sehem tiegħek fir-Red Cross? U liema huma dawk il-mumenti li qatt ma tinsa?

    Permezz tal-volontarjat iffurmajt bħala persuna. Akkost li forsi ser ninstema’ retoriku insostni illi meta tagħti, s-sodisfazzjon huwa ħafna akbar minn meta tirċievi. Tħoss ċertu kuntentizza li ma ġġibhiex mod ieħor. Apparti minn hekk dax-xogħol jagħtik il-possibilità li tagħti l-għajnuna tiegħek…. xi drabi saħansitra ssalva l-ħajja ta’ bniedem. Kemm hu sabiħ li tista’ tgħid li salvajt ħajja ta’ bniedem?

    Mument li ma ninsa qatt kien meta rnexxieli nsalva lit-tifla t’oħti. Kont għadni fil-bidu tiegħi fil-Malta Red Cross. Niftakar li kienet waqfet tieħu n-nifs u li għall-ewwel iffriżajt bil-biża’. Imma mbagħad ftakart f’dak li kont tgħallimt …. ma ninsihom qatt dawk il-mumenti.

    Diżappunti jkun hemm ukoll. Jiena naħdem l-isptar u konxju kemm it-tobba jagħmlu l-almu tagħhom imma ċertu pazjenti xorta jmutu. L-importanti f’dawn il-każi hu li tagħmel l-almu tiegħek biex tgħin imbagħad il-bqija tħallih f’idejn Alla.

    (Dan l-artiklu ġie ppubblikat fit-Torċa tad-9 t’Awwissu 2009)

    2009.08.09 / no responses / Category: Torca - Perspettivi